Ɗan majalisar wakilan Najeriya, Alhassan Ado-Doguwa, ya yi iƙirarin cewa albashin sabon ma’aikacin Hukumar Kula da Albarkatun Man Fetur ta Najeriya (NUPRC) ya ninka nasa sau 3

Ɗan majalisar wakilan Najeriya, Alhassan Ado-Doguwa, ya yi iƙirarin cewa albashin sabon ma’aikacin Hukumar Kula da Albarkatun Man Fetur ta Najeriya (NUPRC) ya ninka nasa sau 3.

Doguwa, wanda ke wakiltar mazaɓar Doguwa/Tudun Wada a Jihar Kano, ya ce albashinsa na wata a matsayin ɗan majalisa ya kai naira 616,000.

Ya kuma yi magana kan batun Political Exposure, yana mai cewa an nemi wasu ma’aikatan Babban Bankin Najeriya (CBN) su bayyana alaƙarsu da mutanen da ke da manyan muƙaman siyasa a lokacin da ake shirin rage yawan ma’aikata.

A cewarsa, an kuma bai wa wasu ma’aikatan damar barin aiki bisa wani tsari da zai ba su kuɗin da ya yi daidai da albashin shekaru 5 ko 10, ciki har da ɗansa.

Doguwa ya kuma yi iƙirarin cewa idan wani ɗan majalisa ya rasu, ana cire naira 100,000 daga asusun kowane ɗan majalisa domin taimaka wa iyalan mamacin.