Karin mutane miliyan 17.9 sun faɗa cikin talauci a Najeriya - UNDP

Karin mutane miliyan 17.9 sun faɗa cikin talauci a Najeriya - UNDP

Hukumar shirin raya kasashe ta majalisar Ɗinkin Duniya (UNDP) ta ce yawan talauci ta fuskoki daban-daban a Najeriya ya ƙaru daga kashi 33 cikin 100 a shekarar 2021 zuwa kashi 38.7 a shekarar 2024.

Rahoton hukumar na shekarar 2026 ya nuna cewa ƙarin mutane miliyan 17.9 ne suka faɗa cikin talaucin a tsakanin shekarun biyu, inda adadin waɗanda abin ya shafa ya kai miliyan 90.1, daga miliyan 72.2 a shekarar 2021.

Rahoton, wanda aka samar tare da haɗin gwiwar Oxford Poverty and Human Development Initiative (OPHI), ya ce Najeriya ce ta fi samun ƙarin mutanen da ke fama da talauci a cikin ƙasashe biyar da aka samu irin wannan ƙaruwa.

Sauran ƙasashen su ne Afghanistan, Jamhuriyar Afirka ta Tsakiya, Guinea da Kyrgyzstan.

UNDP ta bayyana cewa wannan ƙaruwa ta soke ci gaban da Najeriya ta samu tsakanin shekarar 2018 da 2021, lokacin da adadin talauci ya ragu.

Rahoton ya bayyana cewa ana auna talauci ta fuskoki daban-daban ne ta hanyar duba matsalolin da mutane ke fuskanta a fannoni kamar lafiya, ilimi, abinci mai gina jiki, ruwan sha, wutar lantarki, muhalli da gidaje.

Ya kuma nuna cewa akwai babban bambanci tsakanin yankunan Najeriya, inda yawan talauci ya bambanta daga kashi 3.7 zuwa kashi 88.3.

A matakin duniya, rahoton ya ce mutane biliyan 1.2 a ƙasashe 108 na fama da matsanancin talauci ta fuskoki daban-daban, yayin da yankin Afirka kudu da Sahara ya fi kowanne yanki fama da matsalar, inda mutane miliyan 616 abin ya shafa.

Haka kuma, rahoton ya nuna cewa yara miliyan 617 ne ke fama da wannan nau'in talauci a duniya, wanda ya kai kashi 51.5 na dukkan mutanen da abin ya shafa.

Sai dai hukumar ta jaddada cewa rahoton Najeriya ya dogara ne kan bayanan binciken gidaje na shekarar 2024, ba wai auna talauci kai tsaye a shekarar 2026 ba.