Siyasa : Tsohon ministan wasanni da matasa, Solomon Dalung, ya yi ikirarin cewa magoya bayan jam’iyyar ADC sun samu kiran waya daga kabarin tsohon Shugaban Ƙasa Muhammadu Buhari,

Tsohon ministan wasanni da matasa, Solomon Dalung, ya yi ikirarin cewa magoya bayan jam’iyyar ADC sun samu kiran waya daga kabarin tsohon Shugaban Ƙasa Muhammadu Buhari, inda aka umurce su da su zaɓi Atiku Abubakar a zaɓen 2027.

Dalung, wanda jigo ne a ADC, ya bayyana hakan ne ranar Alhamis yayin wata hira da gidan talabijin na Channels TV a shirin Politics Today.

Ya ce Atiku, wanda shi ne ɗan takarar shugaban ƙasa na ADC, ya gaji tsarin siyasar tsoffin shugabannin ƙasa, Umaru Musa Yar’Adua da Muhammadu Buhari.

Ya kuma ce ziyarar da matar marigayi Buhari, Aisha Buhari, ta kai wa Atiku a gidansa da ke Abuja a watan da ya gabata, alama ce ta sauya goyon bayan siyasar Buhari zuwa ga Atiku.

“Saƙon da ta kai shi ne an yi nasarar sauya ƙuri’u miliyan 12 zuwa ga Atiku. Mun samu kiran waya daga kabarin Buhari cewa mu zaɓi Atiku,” in ji Dalung.

Ya bayyana cewa Buhari ya samu ƙuri’u miliyan 12.2 a zaɓen 2011, sannan miliyan 15.4 a 2015 da miliyan 15.2 a 2019.

Dalung ya nuna kwarin gwiwar cewa Atiku zai kayar da Shugaba Bola Tinubu a zaɓen 2027, ko da kuwa APC ta yi ƙoƙarin hana ADC gudanar da yaƙin neman zaɓe.

Ya kuma ce goyon bayan da Atiku ke da shi a faɗin ƙasar ya fi taron jama’ar da wasu ’yan siyasa ke tarawa a lokacin gangamin yaƙin neman zaɓe, waɗanda ya kira “taron haya”.

Dalung ya taɓa riƙe muƙamin Ministan Wasanni da Matasa a gwamnatin Buhari daga Nuwamban 2015 zuwa Mayun 2019.