Shin Ko Haka Zatayi Kuwa..?

Shugabannin wasu jam’iyyun adawa a Najeriya sun ƙara kaimi wajen tattaunawa kan samar da ɗan takarar shugaban ƙasa guda ɗaya da zai wakilci ɓangaren adawa a zaɓen 2027.

A wani sabon mataki na tattaunawar, wasu shugabannin jam’iyyun adawa sun gana da tsohon mataimakin shugaban ƙasa kuma ɗan takarar jam’iyyar ADC, Atiku Abubakar, a Abuja, wasu daga cikin waɗanda suka halarci taron sun tabbatar da hakan ga Daily Trust.

Rahotanni sun ce tattaunawar ta mayar da hankali ne kan hanyoyin da za'a bi wajen samar da ɗan takara guda, da kuma yadda za'a tabbatar da dorewar haɗin gwiwar idan an cimma matsaya.

Sai dai har yanzu akwai ƙalubale wajen cimma matsaya, kasancewar wasu manyan ’yan takarar adawa sun riga sun samu tikitin jam’iyyunsu, tattaunawar da aka yi a baya ma ta fuskanci rashin jituwa kan wanda zai samu tikitin haɗin gwiwar.

A watan Satumba, Farfesa Pat Utomi ya jagoranci wani yunƙuri na tattaunawa da wasu manyan ’yan takarar adawa, ciki har da Atiku Abubakar, Peter Obi, Adewole Adebayo, Seyi Makinde, Donald Duke da Omoyele Sowore, domin duba yiwuwar samar da matsaya ɗaya kafin zaɓen 2027.

Rahotannin baya-bayan nan sun nuna cewa batun haɗa kan jam’iyyun adawa da samar da ɗan takara guda har yanzu yana kan teburin tattaunawa, amma ba a bayyana cewa an cimma yarjejeniya ta ƙarshe ba.