Interpol ta kama ƴan Najeriya biyu kan zargin damfarar Intanet ta Dala Miliyan 2.4

Interpol ta kama ƴan Najeriya biyu kan zargin damfarar Intanet ta Dala Miliyan 2.4

Hukumar ƴansandan kasa da kasa (Interpol) ta kama ’yan Najeriya biyu bisa zargin hannu a laifukan intanet, ciki har da damfarar zuba jari ta dala miliyan 2.4.

Interpol ta bayyana cewa kamen ya biyo bayan wani samame mai suna Operation Serengeti III, wanda aka gudanar daga ranar 29 ga Yuni zuwa 31 ga Agusta, 2026, tare da haɗin gwiwar hukumomin tsaro na ƙasashen Afirka 20 da Amurka.

A cewar sanarwar da hukumar ta wallafa, an kama mutum 1,462, tare da wargaza hanyoyin aikata laifukan intanet guda 10,909 da kuma kwato kuɗaɗen haram da suka kai dala miliyan 105.

A Najeriya, an kama wani mutum da ake zargi da gudanar da damfarar intanet ta hanyar satar bayanan shiga manhajoji, inda ya tattara adireshin imel kusan miliyan 2.1. Hukumomi sun kuma ƙwato wata mota alfarma da ake zargin an saya da kuɗaɗen laifuka.

Haka kuma, an kama wani mutum kan zargin hannu a wata damfarar zuba jari ta ƙasa da ƙasa da ake tallatawa ta manhajojin saƙonni. Bincike ya nuna cewa an tura kuɗaɗen da ake zargin haramun ne da suka haura dala miliyan 2.4, waɗanda aka karkatar da yawancinsu ta hanyar hada-hadar kuɗaɗen kirifto.

Interpol ta ce samamen na da nufin yaƙi da damfarar intanet, satar bayanan kasuwanci ta imel, kai hare-haren yanar gizo, da kuma karɓar kuɗi ta hanyar barazana.

Hukumar ta ƙara da cewa ƙasashen da suka shiga aikin sun haɗa da Najeriya, Ghana, Kenya, Uganda, Afirka ta Kudu da sauran ƙasashen Afirka.