Kocin tawagar ƙwallon ƙafar Nijeriya ta 1996 ya ce har yau bai karɓi lambar zinare ta lashe gasar Olympic ba bayan shekaru 30

Kocin tawagar ƙwallon ƙafar Nijeriya ta 1996 ya ce har yau bai karɓi lambar zinare ta lashe gasar Olympic ba bayan shekaru 30

Tsohon kocin Super Eagles, Jo Bonfrere, ya ce har yanzu bai karɓi lambar zinare ta gasar Olympics ta 1996 da kuma ladan da aka yi masa alkawari ba, duk da cewa ya jagoranci Najeriya ta lashe gasar ƙwallon ƙafa ta maza a Atlanta.

Bonfrere, ɗan ƙasar Netherlands mai shekaru 80, ya bayyana hakan ne a wata hira da tashar CreativeLordTV a Ebonyi, inda ya halarci buɗe gidan wani mutum mai suna Chief Agueze a ranar 10 ga Oktoba, 2026.

Ya ce bai taɓa ganin lambar zinaren ba, don haka bai ma san yadda take ba.

Bonfrere ya ce sauran ’yan wasa da jami’an tawagar sun karɓi nasu ladan, amma shi har yanzu bai samu komai ba.

A gasar Olympics ta Atlanta ta 1996, Najeriya ta doke Argentina da ci 3-2 a wasan ƙarshe, inda ta zama ƙasa ta farko a Afirka da ta lashe lambar zinare a ƙwallon ƙafa ta maza a gasar.

Bonfrere ya kuma bayyana cewa ya fuskanci matsin lamba daga wani minista kan zaɓen ’yan wasan da za su wakilci Najeriya, amma ya dage kan zaɓen waɗanda yake ganin za su iya lashe gasar.

Sai dai har yanzu ba a tantance ikirarin Bonfrere na rashin karɓar lambar zinare da ladan nasa ba daga wata majiya mai zaman kanta.