Labarin mutuwar wani matashin soja da ake zargin jami'an NDLEA sun kashe shi abin tashin hankali ne.

Ya kamata a dauki mataki

Labarin mutuwar wani matashin soja da ake zargin jami'an NDLEA sun kashe shi abin tashin hankali ne.

Yadda masu rawaito labarin Ke bayyanawa dai wannan matashin soja yayi kokarin bayar da kariya ga wasu da ake zargi da hulda da miyagun kwayoyi har ta kai an sami sabani kuma jami'an sun sakarwa wannan soja darma.

Abin tashin hankali da ke bukatar mahukuntan rundunar soji da na NDLEA su tsoma baki shine, naga wani soja ya fara yin kira ga abokan marigayin kan su fito su daukar masa fansa, wanda nasan Karon ba zai kyau ba, yakamata a yi gaggawar daukar mataki domin a bayanin wannan matashi,shi marigayin ya fitar da wuka su kuma Jami'an NDLEA suka har be shi bayan sun same shi suka kara masa harbin suka kuma dauke shi suka tafi da shi ofishin su maimakon asibiti, kamar yadda wannan soja yace shaidun gani da ido sun rawaito.

Irin wannan idan har ya tabbata to gaskiya jami'an sun wuce makadi da rawa wajen karin yin harbi na 2 ,domin babban abin da aka fi so a doka shine kama mutum domin gurfanar da shi a gaban kotu dan haka harbin farko ya zama wajibi tun da ya fitar da wuka,amma harbi na 2 bidi'a ne a tsarin aiki yin hakan kuma tamkar daukar doka a hannu ne idan har hakan ya tabbata.

A takaice dai wannan lamari zai iya zama gagarumin rikici a tsakanin jami'an soji da na NDLEA wanda ka iya jawo batacciya ko kuma kare jini biri jini,dan haka ya zama wajibi a yi gaggawar shiga tsakani ayi wa tufkar hanci a kafa bincike a gurfanar da wadanda suka yi harbin idan sun yi laifi a hukunta su domin kaucewa barazanar da ka iya afkuwa idan har abokan aikin marigayin sun dauki shawarar wannan matashin dake kira da a daukar wa marigayin fansa.

Allah ya zuwa wutar ruwan sanyi ya kiyaye gaba.