Saudiyya ta zartar da hukuncin kisa kan ’yan Bangladesh biyu bisa aikata lalata a cikin masallaci a Makka

Saudiyya ta zartar da hukuncin kisa kan ’yan Bangladesh biyu bisa aikata lalata a cikin masallaci a Makka

Mahukuntan Saudiyya sun sanar da kashe wasu ’yan ƙasar Bangladesh biyu bisa zargin aikata lalata a cikin wani masallaci da ke birnin Makka mai alfarma.

Ma’aikatar harkokin cikin gidan Saudiyya ce ta bayyana hakan a wata sanarwa da ta fitar ranar Laraba, inda ta bayyana sunayen waɗanda aka kashe a matsayin Nazrul Islam Abdul Basir da Siti Akhtar, mace.

Sanarwar ta ce jami’an tsaro sun kama mutanen biyu bayan faruwar lamarin, inda aka gudanar da bincike tare da gurfanar da su a gaban kotu.

A cewar ma’aikatar, kotun da ta saurari shari’ar ta same su da laifi, tare da yanke musu hukuncin kisa bisa tsarin hukunci na Ta’zir, saboda girman laifin da suka aikata da kuma keta alfarmar masallaci.

Ta ƙara da cewa hukumomin shari’a sun tabbatar da hukuncin kafin a samu umarnin sarauta na aiwatar da shi bisa tanade-tanaden Shari’ar Musulunci.

Ma’aikatar ta ce an aiwatar da hukuncin kisan a yankin Makka ranar Laraba.

Ta bayyana cewa matakin ya nuna ƙudirin gwamnatin Saudiyya na tabbatar da tsaro, tabbatar da adalci da kuma aiwatar da dokokin Shari’ar Musulunci kan mutanen da suka keta alfarmar masallatai da mutuncin wasu.

Haka kuma, ma’aikatar ta yi gargaɗin cewa duk wanda ya aikata irin wannan laifi zai fuskanci hukuncin da Shari’ar Musulunci ta tanada.