Hukumar Kula da Makamashin Nukiliya ta Duniya (IAEA) ta bayyana cewa har yanzu ba ta iya tantance ainihin inda Iran ta ajiye wasu muhimman kayayyakin ura

Hukumar Kula da Makamashin Nukiliya ta Duniya (IAEA) ta bayyana cewa har yanzu ba ta iya tantance ainihin inda Iran ta ajiye wasu muhimman kayayyakin uranium da aka inganta (Enriched Uranium) ba, sakamakon rashin samun cikakken bayani da damar gudanar da bincike a cibiyoyin nukiliyar ƙasar.

Rahoton da aka fitar a watan Satumba na 2026 ya nuna cewa hukumar ba ta samu damar tantance matsayin wata cibiya ta huɗu da Iran ta bayyana za ta kafa domin tace uranium a Isfahan ba. IAEA ta ce ba ta san ainihin inda cibiyar take ba, ko an kammala gininta, ko kuma ko ta fara aiki.

Hukumar ta kuma bayyana cewa tun bayan hare-haren da Amurka da Isra’ila suka kai wa cibiyoyin nukiliyar Iran a watan Yunin 2025, ta rasa damar tabbatar da inda wasu muhimman kayayyakin uranium da aka tace suke, da kuma adadinsu.

Kafin ta rasa wannan damar sa ido, IAEA ta kiyasta cewa Iran tana da nauyin kilogram 440.9 na uranium da aka inganta zuwa kashi 60 cikin 100, matakin da ke kusa da wanda ake buƙata wajen ƙera makamin nukiliya, duk da cewa wannan kaɗai ba ya tabbatar da cewa an ƙera makami.

Daraktan hukumar, Rafael Grossi, ya sha buƙatar Iran ta ba da bayanai kan halin da cibiyoyin nukiliyarta suke ciki tare da bai wa masu binciken damar tabbatar da matsayin kayayyakin uranium ɗin.

Dove News Hausa — Kafar Yaɗa Labarai Na Gaskiya

Domin samun ingantattun labarai shigo shafin👉 DOVE NEWS HAUSA kayi follow.