Nidal Malik Hasan - mutumin da zai kafa tarihi a dalilin yadda zai mutu.

Nidal Malik Hasan - mutumin da zai kafa tarihi a dalilin yadda zai mutu.

Gwamnatin Amurka, a ranar Alhamis, ta sanar cewa za ta haska kai tsaye, yadda za a aiwatar da hukuncin kisa kan Nidal Malik Hasan - wani mutum da aka yanke wa hukuncin kashe mutum 13 da raunata wasu mutum 32 a cikin wani sansanin sojojin Amurka a shekarar 2009.

Rundunar sojojin Amurka ta sanar a cikin wannan makon cewa za a bindige Mista Hasan ne a bainar jama'a - wanda shi ne karon farko da za a yi haka cikin shekara 65 - bayan kalaman da Sakataren Yaƙi na Amurka Pete Hegseth yayi da ke tabbatar da haka.

Wane ne Nidal Malik Hasan?

Nidal Hasan wani tsohon sojan Amurka mai riƙe da muƙamin manjo, kuma likitan ƙwaƙwalwa ne ɗan asalin jihar Virginia.

Ya amince cewa shine ya harbe sojoji 13 da raunata wasu 32 a cikin wani asibiti da ke cikin sansanin Fort Hood na sojojin Amurka wanda ke jihar Texas ta kudancin Amurka a shekarar 2009.

Yayin shari'ar da aka yi masa a 2013, ya bayyana cewa dalilinsa na kashe sojojin shine domin kare Musulmai da ƴan ƙungiyar Taliban daga hare-haren dakarun Amurka a Afghanistan.

An dai harbi Hasan yayin da ya kai harin, kuma tun lokacin yake amfani da kujerar guragu sakamakon raunin da ya samu.